मुंबई, भारत – बलिउड सुपरस्टार सलमान खानको घरमा एकपटक फेरि सुरक्षा चुनौती देखिएको छ। मे २० मा एक युवक कारभित्र लुकेर ग्यालेक्सी अपार्टमेन्ट छिरेपछि प्रहरीले तत्कालै पक्राउ गरेको छ।
घटना सार्वजनिक भएपछि फिल्म उद्योग र प्रशंसकबीच फेरि एकपटक सलमानको सुरक्षाबारे चासो बढेको छ।
कारभित्र लुकेर छिरे युवक, प्रहरीको सतर्कता कायम
पक्राउ परेका युवक २३ वर्षीय जितेन्द्रकुमार हुन्, जो भारतको छत्तीसगढका बासिन्दा हुन्। बान्द्रा प्रहरीले जानकारी दिएको अनुसार उनी बिहान ९:४५ बजे अपार्टमेन्ट वरिपरि संदिग्ध रूपमा घुमिरहेका थिए। प्रहरीले उनलाई सम्झाएर त्यहाँबाट हट्न आग्रह गरे पनि उनले आक्रोशमा आफ्नो मोबाइल भाँचिदिए।
साँझ ७:१५ बजे ती युवक फेरि फर्किए र एक स्थानीय व्यक्तिको कारमा लुकेर अपार्टमेन्टको मुख्य गेट पार गर्दै भवनभित्र प्रवेश गरे। तर घटनास्थलमा तैनाथ सुरक्षाकर्मीहरूले उनलाई तुरुन्तै नियन्त्रणमा लिएर बान्द्रा प्रहरीको जिम्मा लगाए।
२ दिनमै दोहोरिएको सुरक्षा उल्लंघन, महिला पनि समातिइन्
यो घटनाभन्दा दुई दिनअघि, मे १९ मा ईशा छाबडा नामकी एक महिलाले पनि सलमानको घर प्रवेश गर्ने प्रयास गरेकी थिइन्। उनलाई पनि प्रहरीले तत्काल नियन्त्रणमा लिएको थियो। दुवै घटनाबारे विस्तृत अनुसन्धान जारी रहेको बान्द्रा प्रहरीले जनाएको छ।
पहिले पनि आक्रमणको सिकार बनेका छन् सलमान
यो घुसपैठ घटनाले सलमान खानको सुरक्षामा फेरि प्रश्न उठाएको छ। स्मरणीय छ, गतवर्ष अप्रिल १४ मा ग्यालेक्सी अपार्टमेन्टबाहिर गोलीबारी भएको थियो। उक्त आक्रमणको जिम्मेवारी कुख्यात लरेन्स ग्याङले लिएको थियो। त्यसपछि प्रहरीले सात जनालाई पक्राउ गरेको थियो, जसमा एक अभियुक्तले प्रहरी हिरासतमा आत्महत्या गरेका थिए।
सलमान खानको सुरक्षामा थप कडाइ
पछिल्ला घटनाहरूपछि सलमान खानको सुरक्षामा थप सतर्कता अपनाइएको छ। प्रहरीले सेलिब्रेटी सुरक्षालाई लिएर रणनीति पुनः मूल्याङ्कन गरिरहेको बताइएको छ। बान्द्रा प्रहरी स्टेशनले एफआईआर दर्ता गरिसकेको छ र थप अनुसन्धान जारी राखिएको छ।
