चितवन, जेठ ५ – चितवन राष्ट्रिय निकुञ्जको टोलीले गैँडाको खागजस्तो देखिने बहुमूल्य आखेटोपहारसहित दुई जनालाई पक्राउ गरेको छ। विशेष सूचनाको आधारमा भरतपुर महानगरपालिका–९ स्थित बिसहजारी रोड क्षेत्रबाट आइतबार दिउँसो करिब ३ बजे उनीहरूलाई नियन्त्रणमा लिइएको हो।
गैँडाको खागको ओसारपसार भइरहेको आशंकामा निकुञ्ज कार्यालय र नेपाली सेनाको नयाँ गोरख गणबाट खटिएको संयुक्त टोलीले निगरानी बढाएको थियो। सोही क्रममा शंकास्पद गतिविधिमा संलग्न दुई व्यक्तिलाई नियन्त्रणमा लिई अनुसन्धान सुरु गरिएको हो।
चितवन राष्ट्रिय निकुञ्ज कार्यालयका सूचना अधिकारी अविनाश थापा मगरका अनुसार, बरामद वस्तु गैँडाको खाग हो वा होइन भन्ने पुष्टि प्राविधिक परीक्षणपछि हुनेछ। पक्राउ परेकाहरूविरुद्ध हाल वन्यजन्तु संरक्षण ऐन अनुसार कानुनी प्रक्रिया अगाडि बढाइएको छ।
संरक्षित वन्यजन्तु तथा तिनका अंगहरुको तस्करी रोकथामका लागि चितवनमा सुरक्षा निगरानी थप कडा बनाइएको निकुञ्ज कार्यालयले जनाएको छ।
